 |
| ديون نفسية |
قبل سنة قابلت راجل باين عليه البساطة والتواضع وقلة الحيلة كان راجل طيب قوى وواضح جدا انو غلبان في حياتو ومقهور الراجل ده قلي بصريح العبارة وبصوت مقهور وبغيظ مكتوم
- انا ليا عند اخويا المتوفي ديون معنوية كفيلة انها تدخله نار جهنم وتحرمه الجنة
طبعا انا معرفتش ايه ارد عليه لانه اخوه خلاص متوفي وفيش حاجة بايد اي حد انو يعملها فرديت عليه عشان اهون عليه مش اكتر
- عندك حق...بس هوه في دار الحق دلوقتي ولازم تسامحه...قلي بكل قهر وصوت باكي ...مش قادر...حاولت كتير ومقدرتش.
انا سكت معرفتش ايه ارد عليه وهو كمل بحزن وبؤس:
- قبل ما يصلو عليه الجنازة في واحد من معارفنا طلع وخطب في الناس وبنهاية الخطبة سأل اذا كان حد ليه دين مادي عند المتوفي يبلغ عشان نسددها، انا باللحظة دي تمنيت الخطيب يقول ( لو المتوفي مديون بدين معنوي لحد يبلغ يمكن الداين يسامحه)
قالي الكلام ده والدموع بتنزل من عينيه بمرارة والم وكنت عاجز لانه مفيش حاجة تقدر تخفف عنه والوقت خلاص فات.
يا جماعة خدوها مني نصيحة ...الديون المعنوية والنفسية صعبة جدا واللي بيموت وعليه دين معنوي وظلم وكلام جارح قاله لحد واثر عليه ودمره من جواه محدش ينساه بسهوله، عشان كدة قبل ما تموتوا اتخلصوا من ديونكم النفسية مع الغير. حتى لو كان اقرب الناس ليكم لازم تستسمحوه ومتخلوش كبرة النفس تفرق بينكم .
- في زمانتنا قالو انو الانسان صيت وسيرة، مظنش انه في حد عاقل يعمل مصايب معنوية ونفسية مع حد لدرجة توصله انه يتحسبن عليه طول ما سيرته تيجي في الكلام ...ده شعور كتير صعب ومؤلم.
- نصيحة لكل غشيم ، لكل سليط اللسان ، لكل فظ الطباع ، احذر ... الديون المعنوية مش راح تخليك تتهنى بحياتك وبعد مماتك ، سهلو الحياة على بعض، حبو بعض واجبروا بخاطر بعض لان الحياة قصيرة والدنيا مبترحمش والحياة بجد دوارة.
مصطفى الديب
((يا ليت قومي يعلمون ))
تعليقات
إرسال تعليق
يسرنا سماع رأيكم